「白楊隧道」佇天祥白楊步道的入口。對磅空口探頭看覓， 烏嘛嘛的磅空內面， 遠遠一粒金爍爍的光佇遐。行入去磅空內面， 冷冷的風當面吹來， 予人規身軀攏起雞母皮。佇烏暗中點燈的手電仔光， 因為磅空傷長， 干焦倚身驅這跤兜看會清楚， 四箍圍仔暗眠摸山貓， 予人毛骨悚然。遠遠的出口彼粒若金幣的光， 是一个寄望； 手電仔光是心內唯一的倚靠。恬靜當中聽真清楚家己喘氣的聲， 佮山泉水咧㴙㴙滴。烏暗予人感覺袂出來家己的存在， 這个時陣足希望有人對–對面行過來， 聽好互相助膽。愈行到半中站心愈膽嚇， 上好鼻仔摸咧， 三步做兩步大伐向前共行去。
行出洞口若親像是天光， 有一種恍然大悟的爽快， 心神攏齊放輕鬆落來； 敢若對暗娑娑的暗暝行到光顯顯的日時。原來磅空這爿另外有乾坤， 山壁迵天遐崎， 石頭予水沖甲金滑金滑， 線條藝術藝術； 溪水掣流通光仔通光。日光炤著的所在攏佇閃爍， 水面、石頭、山尾溜的樹葉仔 ， 若親像會講話咧反射。水， 對懸低坎沖落水堀仔， 浪浪叫真大聲。拍滂激起來的白波水沫， 佮天頂的白雲仝色； 水底的色水綠摻藍、藍摻綠真好看。石頭， 有摃破卵仁掖佇卵白的黃、有大細個（kâinn） 圓輾輾、有幼幼秀秀； 予水洗盪甲清氣眈眈。
一陣白人對磅空行出來， 兩三个皮膚曝甲金爍爍。畚埽一包手捾咧， 誠有觀光客的誠意， 人的心佮山仝款媠， 按呢心境相映。閃閃爍爍的急水溪， 對三千外公尺， 瀉到平埔海峽； 迵過冰河時期萬年的臺灣山脈， 一代傳（thn̂g） 過一代。